سهندیم

شاه داغیم چال پاپاغیم ائل دایاغیم شانلی سهندیم

باشی طوفانلی سهندیم

باشدا حیدر بابا تک قارلا- قیروولا  قار یشیب سان

سون ایپک تئللی  بولود  لار  لا افقده ساریشیب سان

ساواشار کن باریشیب سان .

گویدن الهام آلالی سر ری سماواته دیه رسن

هله آغ کورکی بورون یازدا یاشیل دون دا گیه رسن

قورادان حالوا ییه رسن   .

دوشلرونده صونالار سینه سی تک شوخ ممه لرده

نه شیرین چشمه لرین وار

او یاشیل تللری یل هورمه ده آینالی سحرده

عشوه لی اشمه لرین وار .

قوی یاغیش یاغسادا یاغسین

سل اولوب آخسادا آخسین

یانلاروندا دره لر وار.

قوی   قلمقاشلارین اوچسون فره لرله هامی باخسین

دوشلرین ده هره لر وار

او اتک لرده نه قیزلار یاناغی لاله لرین وار

قوزولار اوتلایاراق نی ده نه خوش ناله لرین وار

آی کیمی هاله لرین وار .

 «ایکینجی حیدر بابایه سلام»

حیدر بابا گلدیم سنی یوخلیام

بیرده یاتام قوجاغوندا یوخلیام

عمری قووام بلکه بوردا حاخلیام

                  اوشاقلیغا دییه م بیزه گلسن بیر

             آیدین گونلرآغلاریوزه گولسن بیر

حیدر بابا چکدون منی گتیردون

یوردوموزا- یووامیزا یتیردون

 یوسفوی اوشاقیکن ایتیردون

          قوجا یعقوب ایتمیشسمده تاپوبسان  

           قووالیوب قورد آغریندان قاپوبسان   

بوردادوشن کروان چاتوب کوچوبدی

 آیریلیغین شربتینی ایچوپدی

عمروموزون کوچی بوردان کوچوبدی

              کوچوب گدوب گدر گلمز یوللارا

              توزی قونوب بو داشلارا کوللارا

بوردا شیرون خاطره لر یاتوبلار

داشلاریلان باشی-باشا چاتوبلار

آشنالیغین داشین بیردن آتوبلار

              من باخاندا قوزانولار باخوللار

              بیرده یاتیب یاندیریللار یاخیللار